Kiko ta FNGV?
Bo ta para na e punto pa cumpra of cuminsa construi un cas propio y bo a puntra pa un fiansa di hipoteca ? Pues ya bo ta na altura cu e instancianan financiero na Aruba ta financia te cu un maximo 80% di e balor riba mercado pa construccion of compra di un cas. Si bo no ta dispone di e medionan financiero sobrante, bo ta haya bo obliga di pospone alcansa e cas di bo soño. FNGV ta brinda bo ayudo y ta duna bo e oportunidad pa fia e suma total di hipoteca cerca e instancia financiero di bo escogencia.
Cera un Garantia cu FNGV
Bo por haya un garantia di FNGV ora di cera un hipoteca cu un di e instancianan financiero na Aruba. E garantia aki ta conta tanto pa un hipoteca pa compra di un cas existente, como pa construccion di un cas propio.
E consultor di hipoteca ta calcula pa bo cuanto precies bo por fia cu un garantia di FNGV. E consultor ta conta bo tambe mas tocante e condicionnan cu ta aplicabel na momento di cera un garantia di FNGV.
Bo por usa tambe e Calculador di Garantia. E herment aki ta duna bo un indicacion di e suma cu por fia maximalmente a base di bo situacion financiero.
.
Pa ken FNGV ta adecuado?
FNGV ta exclusivamente dirigi riba esnan cu mester un sosten pa cu construccion of compra di nan prome cas.
Bo ta biba y traha na Aruba, bo tin nacionalidad Hulandes of bo tin permiso di trabou/estadia y bo no a cumpra of construi un cas propio na Aruba nunca antes ?
E ora FNGV ta aki pa bo !
Pa bin na remarca pa un garantia di hipoteca FNGV mester tene cuenta cu lo siguiente:
-
Bo tin un trabou y entrada fiho
-
Bo tin nacionalidad Hulandes of ta dispone di un permiso di estadia y/of permiso di trabou.
-
E suma di hypoteca no ta surpasa Afls. 350.000
PROME PASO CU FNGV
Con esaki ta traha?
FNGV ta para garantia pa tur hende cu bin na remarca pa construi of cumpra un cas. Despues cu bo a scoge un instancia financiero, bo ta yena e formulario di solicitud hunto cu e consultor di hipoteca. Siguientemente e banco of instancia financiero lo inscribi bo serka nos haciendo uso di e formulario di solicitud firma. Despues di registracion, lo screen bo solicitud y bo lo haya un documento oficial cu e decision tocante bo solicitud pa garantia, via bo banco of instancia financiero.
Gasto
E garantia di FNGV tin gasto cu ne. E gastonan aki ta como lo siguiente pa esun cu ta ricibi e placa:
– Un provision di garantia di 1,5% di e suma completo,un solo biaha
– Gastonan administrativo den curso di tempo di e periodo di garantia
Exigencianan
E consultor di hipoteca por asisti bo cu yenamento di e formulario di solicitud. Pa por trata bo solicitud bon, bo mester hiba e siguiente documentonan cu bo na e combersacion:
– Prueba di identidad valido, inscripcion na Censo y/of permiso di residencia;
– Declaracion di e dunado di trabou;
– E dos ultimo recibonan di salario;
– Rapport di taxacion;
– Acuerdo di construccion y/of acuerdo di compra;
– Carta di midimento/acuerdo di compra di tereno
Haci uzo di nos checklist pa ta sigur cu bo ta cumpli cu tur e rekisitonan. Pa mas informacion tocante si bo ta bin na remarca pa un garantia, bo por consulta nos condicionnan general aki.
Screening
Despues di a entrega e solicitud, lo screen e solicitante. E screening ta encera cu lo mira si na momento di e solicitud, tin debenan pendiente cerca un of mas instancia di credito. Tambe ta controla si e solicitante ya ta propietario di un vivienda, mirando cu FNGV ta duna garantia exclusivamente pa e “prome cas”.
Aki bo ta haya nos formulario di screening.